திரு.அனுராக் ஜெயின் அவர்கள், மத்தியப் பிரதேச மாநில நிலையிலான, 1989 தொகுதியை சேர்ந்த, இந்திய ஆட்சிப் பணி (இ.ஆ.ப) அதிகாரி ஆவார். இவர், சாலைப் போக்குவரத்து மற்றும் நெடுஞ்சாலைத் துறை அமைச்சகத்தின் செயலாளராக உள்ளார். மேலும், இவர் வீட்டுவசதி மற்றும் நகர்ப்புற விவகார அமைச்சகத்தின் கூடுதல் பொறுப்பை வகித்து வருகிறார். இதற்கு முன்பு, இவர் தொழில்துறை மற்றும் உள்நாட்டு வர்த்தகத்தை மேம்படுத்துவதற்கான துறையின் செயலாளராக இருந்தார். மேலும், அந்த பணியின் போது, அவர் பிரதமர் கதி சக்தி-பன்முக இணைப்புக்கான தேசியப் பெருந்திட்டத்தை வழிநடத்தினார். இது, ஏப்ரல் 2023-இல் பொது நிர்வாகத்தில் சிறந்து விளங்குவதற்கான பிரதமரின் விருதைப் பெற்றது.

இவர், இணைச்செயலாளராக, பிரதமர் அலுவலகத்திலும், இந்திய அரசின் நிதி அமைச்சகத்திலும் பணியாற்றினார். அங்கு, உலகின் மிகப்பெரிய நிதி உள்ளடக்க திட்டமான ‘பிரதமர் மக்கள் நிதி திட்டம்’ என்ற, மிக வெற்றிகரமான முன்முயற்சிகளில் ஒன்றை கருத்தாக்கம் செய்து செயல்படுத்திய பெருமை அவருக்கு உண்டு.

திரு.சித்திக் அவர்கள், 1995 ஆம் ஆண்டு தமிழ்நாடு மாநில நிலையிலான இந்திய ஆட்சிப் பணி (இ.ஆ.ப) அதிகாரி ஆவார். இவர், தமிழ்நாடு அரசிலும், இந்திய அரசிலும் பல்வேறு பதவிகளை வகித்துள்ளார். தற்போது, ஜூன் 2022 முதல், சென்னை மெட்ரோ இரயில் நிறுவனத்தின் (சி.எம்.ஆர்.எல்) நிர்வாக இயக்குநராக பொறுப்பேற்றுள்ளார்.

இவர், இந்திய தொழில்நுட்ப நிறுவனம், சென்னையில் மின்னணு மற்றும் தகவல் தொடர்பு பொறியியல் தொழில்நுட்பத்தில் இளங்கலை பட்டம் பெற்றுள்ளார்.

23 ஆண்டுகளுக்கும் மேலான சேவை சாதனையுடன், திரு.சித்திக் அவர்கள், பொதுநிதி, கொள்கை வகுத்தல், உள்கட்டமைப்பு மற்றும் பொது நிர்வாகத்திலும் நிபுணத்துவத்தைப் பெற்றுள்ளார். 1997-1998 வரை, விருதுநகர் மாவட்டம் சிவகாசியில் துணை ஆட்சியராகவும், பின்னர் 1998 இல் நிதித்துறையில், அரசின் கீழ்நிலைச் செயலாளராகவும், 1999 முதல் 2002 வரை நிதித்துறையில், துணைச் செயலாளராகவும், அரசின் நிதியறிக்கை அதிகாரியாகவும் பணியாற்றினார். 2002 முதல் 2004 வரை தருமபுரி மாவட்ட ஆட்சியராகவும், 2006 முதல் 2007 வரை சிவகங்கை மாவட்ட ஆட்சியராகவும் பணியாற்றினார். 2004 முதல் 2006 வரை இரண்டு ஆண்டுகள், அருங்காட்சியகங்களின் இயக்குநராகவும், 2014 முதல் 2017 வரை மூன்று ஆண்டுகள், ஆவணக்காப்பகங்கள் மற்றும் வரலாற்று ஆராய்ச்சி ஆணையராகவும் பணியாற்றினார். இவர், 2017 முதல் 2019 வரை, நிதித் துறையின் முதன்மைச் செயலாளராகவும் (செலவு), 2019 முதல் 2021 வரை வணிகவரி ஆணையராகவும் பணியாற்றினார். டிசம்பர் 2021 முதல், சென்னை மெட்ரோ நிறுவனத்தின் நிர்வாக இயக்குனராக பொறுப்பேற்ற, ஜூன் 2022-க்கு முன்பு வரை, வருவாய் நிர்வாக ஆணையராக பதவி வகித்தார்.

திரு.சித்திக் அவர்கள், 2008 முதல் 2009 வரை, ஒரு வருடம் மத்திய அரசின் செலவினத் துறையில் இயக்குநராகப் பணியாற்றினார். மேலும், 2009 முதல் 2014 வரை, ஐந்து ஆண்டுகள் மத்திய அரசின் உள்துறை மற்றும் நிதி ஆகிய இரண்டு முக்கிய அமைச்சகங்களில் பணியாற்றினார்.

திரு.சித்திக் அவர்கள், இறகுப்பந்தாட்ட விளையாட்டை விரும்புபவர். 2015-ஆம் ஆண்டில் ‘ஆல் இங்கிலாந்து சாம்பியன்ஷிப்’ மற்றும் ‘சுவிஸ் ஓபன்’ போட்டிகளுக்கு, இந்திய இறகுப்பந்தாட்ட அணியின், மூத்த அணி மேலாளராக பணியாற்றியுள்ளார். மேலும், 2016-ஆம் ஆண்டில், பிரீமியர் இறகுப்பந்தாட்ட தொடரின் ஆட்சிமன்ற குழுவிலும் இருந்துள்ளார்.

திரு. டி. ஆர்ச்சுனன் அவர்கள், 1989 தொகுதியை சேர்ந்த இந்திய இரயில்வே பொறியாளர்கள் (IRSE) சேவையைச் சேர்ந்தவர் . இந்திய அறிவியல் கழகத்தில் (1988-1990) கட்டமைப்பு பொறியாளர் (M.E) மற்றும் மதுரை தியாகராஜர் பொறியியல் கல்லூரியில் சிவில் பொறியியல் (B.E) (ஹானர்ஸ்) பட்டம் பெற்றவர். (1984-1988).

சென்னை மெட்ரோவில் திட்ட இயக்குநராக சேருவதற்கு முன்பாக, இவர் இந்திய இரயில்வேயில் சுமார் 20 ஆண்டுகளும், சென்னை மெட்ரோவில் 5 ஆண்டுகள் பிரதிநிதியாகவும், கொச்சி மெட்ரோ இரயில் நிறுவனத்தில் 5 ஆண்டுகள் திட்ட இயக்குநராகவும் பணியாற்றியுள்ளார். இரயில் பாதை பராமரிப்பு, இரயில் பாதை அமைக்கும் பணிகள், மண் சார்ந்த பணிகள், பாலங்கள் கட்டுதல், அகலப்பாதை மாற்றும் பணிகள், பாதை புதுப்பித்தல், வேகக் கட்டுப்பாடுகளை அகற்றுதல் மற்றும் பயணிகள் வசதி பணிகள் ஆகியவற்றில் அவருக்கு பரந்த அனுபவம் உள்ளது.

திரு.அர்ச்சுனன் அவர்கள், ஜூன் 2021 முதல் சென்னை மெட்ரோவின் திட்ட இயக்குநராகவும், இயக்குனர் குழும உறுப்பினராகவும் பதவி வகிக்கிறார். சென்னை மெட்ரோ முதல் கட்ட விரிவாக்கம் (9 கிமீ) மற்றும் இரண்டாம் கட்டம் (119 கிமீ) உள்ளடக்கிய மொத்தம் 3 வழித்தடங்கள் சம்பந்தப்பட்ட 128 நிலையங்கள் தொடர்பான அனைத்து கட்டுமான துறை பணிகளுக்கும் பொறுப்பாளராக உள்ளார். சென்னை மெட்ரோவின் இரண்டாம் கட்டமானது 42 கிமீ சுரங்க வழித்தடத்தையும் மற்றும் 77 கிமீ உயர்த்தப்பட்ட வழித்தடத்தையும் கொண்டுள்ளது. இந்தியாவிலேயே மிகப் பெரிய திட்டங்களில் ஒன்றான, இந்தத் திட்டம் தற்போது மேற்கொள்ளப்பட்டு வருகிறது. திரு.அர்ச்சுனன் அவர்கள், குஜராத் மெட்ரோ இரயில் கார்ப்பரேஷன் லிமிடெட் & பாட்னா மெட்ரோ இரயில் கார்ப்பரேஷன் லிமிடெட் ஆகியவற்றின் இயக்குநர் குழுவிலும் இடம்பெற்றுள்ளார்.

திரு.ராஜேஷ் சதுர்வேதி அவர்கள், டெல்லி ஐஐடியில் இளங்கலை தொழில்நுட்ப அறிவியலில் பட்டம் பெற்ற மின் பொறியாளர். மேலும், இவர், இந்திராகாந்தி தேசிய திறந்தவழி பல்கலைக்கழத்தில், மனிதவள மேலாண்மையில் முதுகலை பட்டையம் பெற்றுள்ளார். ஆற்றல் திறன் பணியகத்தால் சான்றளிக்கப்பட்ட ஆற்றல் தணிக்கையாளர். இந்திய இரயில்வேயில் தனது 33 ஆண்டுகால வாழ்க்கையில், இரயில்வே மின்மயமாக்கல் பணிகள், ஒப்பந்தம் மற்றும் ஒப்பந்த மேலாண்மை மற்றும் பிற கட்டுமான நடவடிக்கைகள்/திட்டங்கள், இழுவை விநியோக சொத்துக்களின் பராமரிப்பு, பொது சேவை பணிகள் மற்றும் இரயில் பெட்டி பராமரிப்பு ஆகியவற்றில் பரந்த அனுபவம் கொண்ட, திரு.ராஜேஷ் சதுர்வேதி அவர்கள், அக்டோபர் 2020 முதல், சென்னை மெட்ரோ இரயில் நிறுவனத்தின் இயக்குனராக (அமைப்பு மற்றும் செயல்பாடு) பொறுப்பேற்றுள்ளார். மேலும், இவர், மின் சக்தி அமைப்பு, இரயில் பெட்டி, சமிக்ஞை, தொலை தொடர்பு, தானியங்கி கட்டண வசூல் செயல்பாடுகள் மற்றும் தகவல் தொழில்நுட்பத்தின் பொறுப்பாளராகவும் உள்ளார்.